مدح وملام على ذكر الرجال الكرام

الجمهورية الجزائرية الديمقراطية الشعبية
بسم الله الرحمن الرحيم
قصيدة من الشعر البدوي باللهجة الجزائرية
العنوان : مدح وملام على ذكر الرجال الكرام
يا خالق الليل والنهار يالله سبحانك *** بعد الظلمة الطاغيه النور يجي ببهاه
الحق عليه النور يدمغ الباطل قدامك *** الحق يعلا ديما مهما الباطل غطاه
كلمة الحق قولها يصفى بيها بالك *** اللي مجرب المرة يعرف الحق ومحلاه
يرتاح عقلك كي تقولها يتهنى ضميرك *** واش من باطل قعد بنيانو وساسو قعد معاه
يا راجل 'دير شاهد العقل هو ميزانك *** خليك متفلسيف ولعب الكريدة في صباه
هذا يدمي فالجرح وهذا يحفر على ساسك *** وهذا يخلط في عرضك ودمك والقاش دواه
وهذا متحجب كي العانس يتكلم بلسانك *** ويجرح بدم جدك وأبيك وعرضو لي خلاه
ولي يعرف الر جالة وقدرهم يعيش على حيطانك *** ولي يبكي بللبهت مداد قلبو هو يقراه
ولي يبكي على دمك ما يقعد عند عديانك *** ولي سفك دم العقيد هو اللي كان يرجاه
لو"جا" راجل واحد ؟ يظهر الحق أمامك *** لاكن هاذي رجالات وعقداء كانت معاه
وأنا 'قلت (الجزائر) (رجال )هم تاريخ بلادك *** ولي ما حبها وما ضحى عليها وكيلو مولاه
هاذي قوافل مالشجعان ضات على وطنك *** والتاريخ المدسوس عندو أكيد الزور بلاه
لاكن "ياهيهات" الغدره تكون من اخوانك *** الزايري معروف فالشدة الايمان يكون معاه
رزانه صادقة وتضحية ماتجيش في بالك *** وما يعرفها غير الصادق وعاشها ويثبتو الله
ياما سمعنا مواقف وشهامة جدي و أجدادك *** وقداه من دروس للعدو في حيرتو خلاه
كي نسمع كلام ما يزيد في شانك *** والناس اللي تهرف زادو للضر دماه
الكلام المسوس كي ضربة الموس صون لسانك *** موحال نسمحلهم حتى باه يذكرو سماه
من يوم الاستقلال عد سنينك وأيامك *** ماسمعناش هذا الباطل وذا التاريخ المكتوب ما لقيناه
ياما رجال بلا وثائق دفنوها عديانك *** خلت الوسام لشاهد الزور والمجاهد تخلف حذاه
لو أنها جات فالطمعة وليد الصيد ينحيهالك *** وتهنى أصل الشبل من الأسد واللبه يماه
هكذا نسميك وليد الذهب المعدن السابك *** ما يتغير ولا يتبدل والوطن ديما في فداه
الناس معادن كون قدو ديرو مثالك *** والرايه ما يديها فالحرب غير القادر على شقاه
هاذي هي المحنة الي نصرت عديانك *** من فرحة الحرية الراجل روح صاد وراه
يقولو ناس زمان "الفرسه مالفارس "متن لجامك *** وكذاب من لا ركب ولاحارب ويقول قداه
وهذا الشعر ماهوللبيع ولاطامع في مالك *** الكلام مالقلب وحب بلادو هو الي بكاه
ماهو طامع في صدقه ولايرجى في جاهك *** الشدة فب ربنا العالي هو مول الجاه
الجزائر ماهيش قرية ولامشتى ديرها في بالك *** هي دولة وشعب وجيش وقادة وعلاماء معاه
أللي ماهوش قادر على الحرب ماكان سلطانك *** والنخبة كانت وافية مالشيوخ ألي ترعاه
العدو باين والنار قادية في دارك *** والقنطاس ثابت وهيشر التبن هوالي زاد قداه
ولله مانامن من قال الخاوة تغدر اخوانك *** صحيح كلامك قابح ماعرفت أخوة ولا عدو في عداه
كل من قام يقول ويشكك قال على جالك *** مالقيت فالتاريخ جزايري حر ومومن يكذب علاه
سمعت وشفت رجال وممكن يكونو جيرانك *** تحرقو بسلك الكهرباء وذابو وماقالو آه
ونساء تفقرت كروشها ميماتنا وميماتك *** كاين لي قطعو نهودها وصبية من بطونها بتشواه
ولي صابو ضر العدو والقهر ألي صابك *-** يعرف قيمة الحرية والاستقلال ألي نلناه
ورجال مثل الجبال تعرف من هم عديانك *** ألي مافرطو فالوطن والعلام يعرفو معناه
رجال راسية قادت الحروب القاسية في وطانك *** محال من كان مثلهم قمة مالقمم يتسب علاه
هاذي رجالات قادت أمم وجيوش بلادك *** فالمغرب العربي وربي كان معاهم مغطيهم بحماه
("كلمة" الله أكبر" ) دوات في سهولك ووديانك *** وكي يسمعها الفرنسي يطرطق وسلاحو كان معاه
شهادة صادقة كنت صادق في ايمانك *** ولي يخدش في دم الشهداء الا عليه لعنة الله
رجال كلات الكسرة اليابسة الايمان هو برهانك *** وجابو الحلف الأطلسي لاكن لاحيلة كلات معاه
رجال قامت ورمات القضية للشعب لي قبالك *** شعب أمي وقتها لاكن صادق القضية كانت مبغاه
تحزمت رجال ونساء وصبرت على مهالك *** أوفات بالعهد وضحات بالدم والشرف وما قالت علاه
قرن وربع الشعب يضحي ويشارك *** بامرا وبايات وشيوخ ماصحاب الجاه
ياناس ياشباب سال التاريخ وسجل في ذهنك *** كم عدد الشعب لي مات الاستعمار قناه
الحرية ماجاتش هدية والفرنسي ماهدالك *** الحرية شجرة غرسوها علاما في الوطن
والشعب بالدم سقاه
ياشعب الجزائر عرب وبربر الاسلام لي يلمك *** لولا الدين ماتتوحد والزوي بشيوخها
لي لمت عضاه
حنا شعب صادق وشرعنا ما فيه شك *** رعاية الله معناها اللي نزلو هو لي يرعاه
يوما جا ''عقبة'' هدت الخلق فالاسلام تشارك *** وطارق المهام برايتو تم الفتح والجيوش معاه
وحطم جيوش الروم بالفتح المبارك *** وعلا الاتسلام بنيانو فوق وطنهم بناه
واشظهرلك واش قاملك واش بقى من كلامك *** يا كلب العدو النباح هاذي أرض (''الله '')
شوف أرض غير أرضو ولا سماء غير سماه ............؟؟



بمناسبة الذكرى 48 لعيد الاستقلال ؛؛ أزف هذه القصيدة اجلالا لشهدائنا ومجاهدينا الكرام

يوم 05 جويلية 1962.................................كتبت يوم 05جويلية2010




من كلمات الشاعر ؛؛ابن الفصيح الادريسي الهجرسي